由上篇藏王狐狸村回到仙台市都係4點幾，呢個時間餓餓地又可以避開人潮，正好一試日本全國聞名既仙台牛舌，同牛牛打茄輪~
(又係佢出場既時候啦~~ )
延伸閱讀：仙台必去景點｜藏王狐狸村一日遊！行程＋交通安排
日本東北交通推介：
仙台牛舌邊間最好味一向都有好多爭論，普遍嚟講以「利久」、「善治郎」兩間最叮噹馬頭
睇過台灣Blogger既比較好似「善治郎」岩我d，所以成為今次既首選目標~
其實各著名牛舌店味道都唔會太差，而且店舖多數位於市中心仙台站一帶要搵唔難~
而當地政府為吸引和方便遊客品嚐，特登於仙台站內起左條「牛脷街」(牛舌通)，將所有名店一炮過集合於此，一來唔使周圍搵，二來就算路過轉車都可以嚟食個快飯~
牛舌街
Plan行程時我都心諗正wor~ 所以上一回先話我原本打算食完先去狐狸村~
但我都係太天真了
換JR pass遲左要坐遲一班車到仙台都無所謂，最大問題係我低估左牛舌既魔力!
痴線使唔使咁多人呀!!!!!
我一個鐘後要上車，但呢條隊無粒半鐘唔使旨意入到去呀!
於是忍痛放棄，求其買d野食住頂肚，去完狐狸村返嚟再入牛舌通望下——- 咪一Q樣……
4點幾ja wor使唔使玩到咁大，星期六都唔係咁ar……
反正都係排隊，我不如搏一搏行5分鐘去「善治郎」總本店睇下有無位~
果然係一個好決定~ 呢度排左半個鐘je~
條隊屈到入樓梯底
「善治郎」的4種牛舌定食
「善治郎」的牛舌定食簡單分為4種 :
- 牛たん —- 招牌(普通大小)
- 上選極厚 —- 牛舌芯之中最靚既部份，最貴
- 牛たん極太 —- 招牌既厚切版本
- 丸たん(得) —- 我都唔知個「得」點解，但呢個火鍋薄片燒+牛舌香腸
牛舌係炭火即叫即燒，按枚數收費，3條起跳，除「3. 牛たん極太」外都會一開二，即係叫3條其實有6塊，跟set會有牛舌蔥湯、麥飯一兜及鼻涕一碗(可轉沙律)
兩條友其中一條唔多食飯ge，建議一個set+散叫一個齋牛舌就夠了~
最最靚既牛舌芯中之芯，我以前係三重縣「一升」食過A5既，今次就特登要一個招牌+一個厚切睇下有咩分別~
先試試個招牌薄切「1.牛たん」~
用炭火燒出嚟既薄牛舌極香!極 脆!極 嫩! 同普通香港食既牛舌完全唔同! 真係估唔到可以好食到咁wor!
只係咬左呢一啖，我已經知自己無嚟錯! 排長龍係值得ga!
善治郎招牌牛舌燒，薄切
善治郎招牌牛舌燒，呢份係encore的~
而厚切版本「3.牛たん極太」比較起來油香更為豐富，滋味無窮! 比普通招牌版本更勝一疇!
不過認真講分別真係好輕微，考慮到性價比，我都係prefer招牌版本份量多d開心d~
善治郎招牌牛舌燒，厚切
至其他配菜，香蔥牛舌湯可以清清味蕾唔錯~
鼻涕(山藥泥)唔係我杯茶評論不能
另一招牌牛舌香腸亦無咩特別，可以不理~ 雖然只係450yen = $25港紙，薩莉亞價錢je~
《たんや善治郎 仙台駅前本店》地址
- 地點 : 宮城県仙台市青葉区中央1-8-38 AKビル 3F
- 前往方法 : JR東日本 東北新幹線 仙台駅から徒歩2分
- 營業時間 : 11:00～22：30 (L.O)
- 官網 : https://www.tanya-zenjirou.jp/restaurant/
- Tabelog : https://tabelog.com/miyagi/A0401/A040101/4011666/
綜合嚟講「善治郎」不論食物同價格我都非常滿意~
唯一問題係店內抽風唔太好成身BBQ味，食完善治郎立即變炭治郎
不過總算知道仙台牛舌果然名不虛傳~
食完行下仙台市再坐JR到山形市中心過一晚，預備聽日去最出名果個溫泉啦~
少少題外話~
山形呢間串燒居酒屋小店「もつ焼串 山形肉問屋センター」宵夜幾唔錯!
應該無咩機會同大家提及ga啦，係度出個名加張相聊表心意啦~
【日本東北仙台山形之旅Day1.2 】仙台牛舌「善治郎」總本店 仙台牛舌 善治郎 日本牛舌
《もつ焼串 山形肉問屋センター》地址
- 地點 : 山形県山形市幸町1-2 駅南ビル 1F
- 前往方法 : 山形駅東口より徒歩2分
- 營業時間 : 15時〜24時
跟 JOYKreator 玩盡世界！✈️
鋒加西亞
Hello我是鋒加西亞~ 歡迎來到我的旅遊Blog網站「鋒加西亞 – 德國工作假期後的世界流浪」!
如果想搵富貴旅行嘆世界資訊ge，抱歉~ 呢度只有由一堆廢話組成，一人背包窮遊的主觀無聊遊記~
此Blog起源於2013年我前往德國工作假期，原名「瘋人鋒語 – 三十前八十後的德國工作假期」，起初純粹想簡單記錄心路歷程，慢慢由日記變成遊記，由出走德國變成走過好多國，至今已到訪49個國家(疫情關係第50個泡湯了…..) 希望疫情快過，大家都可以再次出走啦!
另外我只會用香港式廣東話寫作。
雖然會影響閱讀觀感，但我個人卻非常喜歡這種「看文字就像聽聲音」的感覺，內文用詞也能直接映出我一貫的說話風格，所以——非粵語使用的朋友對不起啊!
總之希望大家看得輕鬆開心~ 如果能對大家計劃行程有所幫助就更好了~
如有任何意見，或想知道更多文章內的資訊，隨時歡迎留言或email funggarcia@gmail.com和我傾下偈呀~
- IG@fung_garcia_backpacker
- FB@鋒加西亞 - 德國工作假期後的世界流浪
更多旅遊貼士：
