【沙巴自由行】亞庇Kota Kinabalu，香港人和台灣人會直接叫其省份名稱「沙巴」，係東馬來西亞最著名的旅遊地點！今次已經係我第3次嚟沙巴，但呢個地方比我既印象仍然無變~熱到嘔既天氣、平到傻既物價、靚到爆既海灘日落~總之就係一個性價比極高既旅遊地方啦!
但原來我一直以來都無寫過呢個我非常喜愛既地方~ 雖然今次唔係一貫既背包刻苦遊，但都比我借呢個機會寫一寫我對呢個地方既一d小見聞啦！
延伸閱讀：【行李清單】 出境旅行必備執行李清單！長短途、四季適用
沙巴自由行｜1. 天氣+衣著
熱！好Q熱！ 你當每日出街都係香港既8月全日光照射啦！
4-5月時日頭36度係閒事，沙巴已經叫係海邊有d風涼少少啦！ 除大商場外，大部份店舖食肆都係無冷氣只得風扇，係街上行簡直係生命既挑戰! 但好處係日日汗如瀑布去水腫一流！
所以帽、太陽眼鏡、短褲、拖鞋都係必備~ 仲要帶多好多件T-shirt替換！
另外防曬霜都係用海洋友善／物理保護一類較好，咁落海都唔怕破壞生態啦～
可以的話帶定支十公升蚊怕水用嚟沖涼 特別係去紅樹林同外島時，我寧願螢火蟲唔飛過嚟都唔要做蚊飯放題呀！
另外10-3月係沙巴的雨季，但觀乎我5月中後都落到天崩地陷，都係帶定雨具好d
同埋機場係蒸籠，同無冷氣無分別，大家自求多福啦～
沙巴自由行｜2. 機票
Air Asia係疫情前後都係飛沙巴首選～價錢平時間靚～ 疫情前$7-800一張來回機票而家無咩可能啦，我買時$1400上下都已經覺得非常合理！
特別當妳望到開關後香港d垃圾酒店都千幾蚊一晚時，我仲有咩理由會去staycation呢？
何況呢排Airasia都幾多優惠下，大家可以捕下～
另一優點係時間～
去程1950，只要我用官方app提早check in，就可以唔經地勤，到機場後直接hand carry衝入登機閘口！我6點金鐘放工都可以機場快線趕得切1925 boarding就知勁啦！回程16:05，返到香港屋企8點幾，岩岩好食個飯訓覺第日返工～fit哂！
Airasia雖然係廉航，但出名機上付費飲食超平～
廿蚊雞一個飯，十蚊一個杯麵仍然係3個鐘機既頂肚首選～特別係椰漿飯Nasi lemak味道不俗！反而好似有d特色既怪叔叔雞飯麻麻地～
不過可能疫情後服務未100%恢復，今次我來回兩程既機倉均非常污糟!!!
直情係座位之間有廁紙，地上有水樽sim卡膠袋等，明顯完全無人清理過！更慘係我由上機開始立即流眼水打乞痴，直到我落機去到酒店都無停過，要食抗敏藥先無事 定係邊條粉腸係背後講我呢…….
沙巴自由行｜3. 市內交通
一個字 —– Grab！
呢個東南亞Uber，同係泰國越南一樣一Grab旁身全市通行，明碼實價免除所有等巴士及比的士劏既麻煩～而且價錢非常平！由機場到市中心加雅街一帶都係RM20～港幣$36，即係$40唔使就有專車接送wor！而市中心內走嚟走去單程最貴都唔過RM10～港幣$18，平過過紅隧呀！
唯一問題係都有20%司機會cut單，或match左後老練咁遠過嚟等到ou……
沙巴自由行｜4. 酒店住宿
搵沙巴住宿，首先要決定行程目的係「日日上山下海周圍玩」定「輕鬆耍廢hea幾日」，繼而選擇住普通酒店定度假村～
普通酒店的於市中心超級勁多，由舊幾水hea酒店至近千的5星級都有～只要小心選擇，even $200鬆d一晚仍然可以有乾淨企理冷氣夠的選擇～
就好似我今次住既Walk In Hotel咁，性價比勁高！
如果想夜晚多野食，可住近加雅街或KK Waterfront 一帶～
但其實沙巴市中心咁細，住邊既分別真係唔大，著重質素可能仲好d～
想hea ge，沙巴市內有兩間最大既海邊resort —–
- The Magellan Sutera Resort 無中文名
- Shangri-La Tanjung Aru, Kota Kinabalu 亞庇丹絨亞路香格里拉水療渡假村個名好長
兩間不論在裝修、設施和價格均大同小異～
若真要講不同，麥姐倫整體地方大d，餐廳評價高d，較近市中心，不過部份房內裝潢較舊
香格里拉細d兼貴d d咁多多，親子客不少，但裝修及設施睇落較新淨，亦坐擁沙巴最靚日落既丹絨亞路海灘地段
最後我揀左Shangri-La～主要都係佢個環境實在太正太梳乎啦～去完後更加覺得服務及設施都係一流！更重要係even佢幾乎係全沙巴最貴既酒店，但性價比依然極高！
我已經罕有地唔係住最平果隻房型，最高層7樓海景大露台睇日落房間，包兩日自助早餐，免費任玩泳池滑水梯、遊戲室、gym等設施及特別活動，有私人海灘睇日落，仲有公認係best in 沙巴既Sunset Bar～咁樣每兩晚加埋都係$3000！即係人均$750一晚ja！香格里拉wor！愉景灣向山一晚都唔止啦！
性價比高到癲，我住到唔想走呀呀呀~~~~ (我遲幾篇會另外再講呢間Shangri La～睇住呢幾張相先啦～)
如果想要其他選擇，可以試下遠離沙巴市中心既另一間香格里拉Shangri-La Rasa Ria, Kota Kinabalu，又或Borneo Beach Villas及Nexus Resort & Spa了
聽聞Shangri-La Rasa Ria有d房有戶外浴池tim～
當然亦聽聞係夜晚捉蟲既好地方啦……..
想住海島既，可以搵下例如美人魚島or馬奴干島Manukan Island既島上民宿～
但島上多數係主打風景同昆蟲，如果想搵馬爾代夫果種係房跳落街就可以比魚咬既villa就少d了～
沙巴自由行｜5. 沙巴搵食
沙巴最出名既美食係海鮮，近海ar ma～ 但主力竟然係中式海鮮……
我唔係好想身處外國但同身處西貢無咩分別，所以直接skip哂～
如果係外國式中餐愛好者，「大茄來」會係頗出名的一間，有旅途上既香港朋友話真係好味的～
而我就過隔離果間著名既24小時Borenos Fried Chicken叫個雞了～
熱辣辣脆卜卜流哂汁，近似Jolibee同哈迪斯既味道，正爆～
講真東南亞國家既炸雞真係有d料到~食襯都無令我失望～
不過呢間Borenos一個餐係香港KFC餐既價位，以沙巴嚟講真係唔平！
正常食肆方面，最有名的富源咖央多，以及怡豐茶室叻沙都唔好味兼抵食～
但都要吐槽下怡豐既間鋪真係好熱好熱好x熱!!!!!!
同埋佢地既「牛雜」原來係指「雜不lung既牛產品」，牛雜會有滑牛同牛丸都真係文化衝擊ar……
晚餐我去過一間酒吧餐廳「Kalamatas Resto Ba’」
黑人老板曾經嚟香港偷師，用乾炒牛河既方法嚟炒棵條，我都唔知有咩分別但又好好味wor～
佢個羊肉漢堡正到我差d要即場encore多個!!!
店內唯一問題係冷氣唔夠勁有d d熱，而且無draft beer!?
黑人老板解釋話因為佢下個星期會搬舖所以d tap頭會過哂去～
但我有fd 岩岩8月去食完話間舖仲原封不動係度……….. 唔知佢啦 ……
沙巴另一名物係街邊燒雞翼~ 本地人自細鍾意食～
所有夜市都能輕易搵到，約RM4元一隻
唔好見佢橙紅色奇奇怪怪，個檔口仲要放緊煙霧彈，其實好鬼好味! 最岩宵夜!
甜食方面，好多網上資料都推荐「去神山牧場中途有間既椰青布甸好正ga～」
唔好去咁遠啦～ 加雅街附近有間名「太子椰」的椰青布甸都非常好味！
其實布咩甸je，說穿了咪係椰青水大菜榚，之不過佢地似乎將椰青水極度濃縮，每一啖都好似一次過食幾個椰青咁，超濃超香超好味！
我仲欣賞佢無加多餘既糖tim～
不過椰青milk shake可以唔使飲，你係百佳買罐椰漿加碎冰shake埋就係咁味啦
沙巴，應該話馬來西亞仲有一樣野好出名，就係榴槤，萬惡既榴槤
咩貓山王沙嗲王、黑刺熱刺、D24 N94，都可以係被稱為「榴槤街」既橋底夜市搵到，聽聞比香港食平超勁多
但關我Q事，我剩係知呢度係地獄，地獄呀!!!!!!!
另外KK Waterfont會有海邊酒吧街，部份有live band環境亦唔錯，聽聞黃昏時同樣可以睇到日落～
而出名既夜市則有加雅街Jalan Gaya、菲律賓夜市Pasar Kraftangan上方的海鮮大排檔，以及亞洲城Asia City一帶
個人比較鍾意加雅街，貪佢唔太大但又多野食，氣氛不錯，價錢亦貼近local～
特別推薦勁夠鑊氣既排隊檔阿伯棵條炒鑊燶，好味！
另外牛油果smoothy、沙嗲串燒，同上文講過既橙色雞翼都值得一試！
菲律賓夜市因半露天落雨後超多污水氹，而且大量街邊拉客既大排檔伙計同你講4仔100蚊4隻，都係不宜久留，何況我見d海鮮都唔算新鮮
亞洲城則黑麻麻似惡魔城，雖然都有不少local人，但氣氛死寂，睇落唔太乾淨，都係算啦～
原本想一篇講哂，點知又太長氣～
沙巴既玩樂觀光留返下一篇啦～
記得follow小弟IG呀～
跟 JOYKreator 玩盡世界！✈️
鋒加西亞
Hello我是鋒加西亞~ 歡迎來到我的旅遊Blog網站「鋒加西亞 – 德國工作假期後的世界流浪」!
如果想搵富貴旅行嘆世界資訊ge，抱歉~ 呢度只有由一堆廢話組成，一人背包窮遊的主觀無聊遊記~
此Blog起源於2013年我前往德國工作假期，原名「瘋人鋒語 – 三十前八十後的德國工作假期」，起初純粹想簡單記錄心路歷程，慢慢由日記變成遊記，由出走德國變成走過好多國，至今已到訪49個國家(疫情關係第50個泡湯了…..) 希望疫情快過，大家都可以再次出走啦!
另外我只會用香港式廣東話寫作。
雖然會影響閱讀觀感，但我個人卻非常喜歡這種「看文字就像聽聲音」的感覺，內文用詞也能直接映出我一貫的說話風格，所以——非粵語使用的朋友對不起啊!
總之希望大家看得輕鬆開心~ 如果能對大家計劃行程有所幫助就更好了~
如有任何意見，或想知道更多文章內的資訊，隨時歡迎留言或email funggarcia@gmail.com和我傾下偈呀~
- IG@fung_garcia_backpacker
- FB@鋒加西亞 - 德國工作假期後的世界流浪
